Başlanğıc nöqtəsindən başlayaraq işarələri izləyərək kəndin içi ilə davam edin. İrəlidə kənddən çıxıb, kiçik çayı keçdikdən sonra (1-ci km-də) sola – meşənin içinə doğru dik dolayı cığır qalxmağa başlayır. 2 km irəlidə açıqlığa çıxan cığır sağa dönərək meşəli dərələrlə əhatələnən açıq sirtlə davam edir və 4 km irəlidə meşə zolağından yuxarı həddinə çatdıqda sola meyl edir (subalp çəmənlikləri). Buradan Zaqatala Dövlət Qoruğunun əsrərəngiz mənzərəsi açılır – meşəli geniş dərələr və başıqarlı dağlar. Sola doğru bir az yoxuş qalxıb dağın sağ yamacı ilə köndələn davam edən cığır 2 km irəlidə Honzoqar yaylağına çatır. 

Honzoqor yaylağından Qəbizdərə kəndinə düşən cığır komaların şərq qurtacağından başlayır və bir az irəlidə düşərgə yerindən keçərək meşəyə düşür. Dolayı cığır meşənin içi ilə 2 km irəlilədikdən sonra meşə yoluna çıxır və 3,5 km sonra kəndə çatır.

Ətraf cığırlar

Ətraf ərazilər Zaqatala Dövlət Qoruğu və sərhəd mühafizə zolağı olduğu üçün işarələnməmiş marşrutlarla hərəkət etmək olmaz. 

Mövsüm
May – sentyabr ayları hava şəraiti və günün uzunluğu baxımından ən uyğun vaxtlardır. Marşrut boyunca yalnız Honzoqor yaylağında kompakt şəkildə 20-30 çoban təsərrüfatı olur. Ətrafda insanlar çox olduğundan gündüz saatlarında itlər təhlükəli deyil. May və sentyabr aylarında çobanların dağda olub-olmadığını yerli camaatla dəqiqləşdirə bilərsiniz. İtlərlə ehtiyatlı davrandıqda bu çoban alaçıqları isti sığınacaq və ya “məlumat mərkəzi” ola bilər. Çadırınız olmasa, boş qalan sığınacaqlardan birində qalmaq üçün çobanlardan xahiş edə bilərsiniz (adətən boş sığınacaq olur). Digər mövsümlərdə də boş sığınacaq tapıb qalmaq olar.

Ümumilikdə, il boyunca bu marşrutla getmək mümkün olsa da, qış aylarında daha çox hazırlıq tələb edəcək. Qış, yaz və payız aylarında hava proqnozunu daha diqqətlə yoxlamağınız, qida, geyim, ləvazimat (çadır, yataq kisəsi və s.) hazırlığı görməyiniz vacibdir. Soyuq və qısa qış günlərində bu marşrutu bir günə bitirmək çox çətin və riskli olduğuna görə uyğun çadır hazırlığı görmədən yola çıxmağınız məsləhət görülmür. 

Qida və gecələmə
Hər iki kəndin ərazisində kiçik dükanlar, kafe və restoranlar fəaliyyət göstərir. Gecələmək üçün qonaq evləri, hotel və digər yerləşdirmə müəssisələri, eləcə də kafe və restoranların yerini xəritədə tapa bilərsiniz.

Su
Cığır boyunca azı 3 yerdə su mənbəyi var. Yaylağa çıxana qədər adambaşı 1-2 litr su götürmək kifayətdir. Yaylaq və yolüstü bulaqlar su ehtiyatınızı artırmağa imkan verəcək.

Nəqliyyat
Zaqatala şəhərindən Car kəndinə mikroavtobusla, (gediş haqqı – 0,30 AZN), yaxud taksi ilə getmək mümkündür (4-7 AZN). Şəhər mərkəzindən “Daşlıq” restoranına kimi (Car kəndinin başlanğıcı) 4 AZN-ə, “Mənzərə” restoranına (kəndin başı) kimi isə 7 AZN-ə getmək olar.

İcazələr və xüsusi mühafizə edilən ərazilər
Bu marşrutla hərəkət etmək üçün öncədən heç bir icazə almaq tələb edilmir. Marşrut xüsusi mühafizə olunan təbiət ərazilərindən, eləcə də sərhəd mühafizə zolağından keçmir və cığır boyunca heç bir yerdə daimi sərhəd mühafizə postu yoxdur. Sərhədçilərlə qarşılaşdıqda sənədləri göstərib, hərəkət marşrutunu izah etmək lazımdır.