Çıraqlıya aparan cığırlar hər yerdə aydın sezilir və tam işarələnib. Bu işarələri izləyərək irəliləyin. Kəndin aşağı hissəsinə çatdıqdan sonra kiçik körpü ilə çayın sağ sahilinə keçmək lazımdır. Buradan meşənin içi ilə yola davam edirsiniz.

Meşəyə daxil olduqdan 3,1 km sonra yol ayrıcına çatılır. Buradan 250 m sağda Kollu kəndi yerləşir. Sol yolla 1,4 km getdikdən sonra Gəncə çayının sahilinə çatırsınız. Çardaq və bulaq olan yerdən çayı keçib, çayın axınının əksi istiqamətində 350 metr irəlilədikdən sonra yol sol tərəfə burulur və 1,8 km sonra Çıraqlı kəndinə çatırsınız.

Marşrut bütünlükdə köhnə maşın yolu ilə irəliləyir. Bu yol hazırda yararsız vəziyyətdədir və maşınların hərəkəti üçün uyğun deyil.

Çıraqlı kəndi Daşkəsən rayonuna aid olsa da, bu rayondan kəndə maşın yolu yoxdur, yalnız Göygöl rayonundan getmək mümkündür.

Marşrutu əks istiqamətdə də gedə bilərsiniz.

Ətraf cığırlar

Bu marşrut Çıraqlı – Əzgilli, Çıraqlı – Cavadxan zirvəsi marşrutları ilə əlaqələndirilə bilər.  

Mövsüm
İlin yağıntı çox düşən və soyuq vaxtlarında Gəncə çayını keçmək çətin ola bilər. 

Qida və gecələmə
Marşrut üzərində yalnız Dəstəfur kəndində bir kiçik dükan var. Odur ki, marşruta başlamamışdan öncə tədarükünüzü görməlisiniz. Çıraqlı kəndində “Rasimin qonaq evi”ndə (+99455 286 5228),  Dəstəfur kəndində isə “Səmayənin qonaq evi”ndə qalmaq olar (+99455 225 7871).

Su
Kəndlərdə olan bulaqlardan başqa, marşrut üzərində yalnız bir yerdə bulaq var – Gəncə çayını keçdiyiniz yerdə sol sahildə. 

Nəqliyyat
Dəstəfur kəndinə çatmaq üçün Daşkəsən rayonundan taksidən istifadə edə bilərsiniz. Kəndə qədər yol yaxşı vəziyyətdədir, bütün növ maşınların hərəkəti üçün uyğundur. Rayon mərkəzindən taksilər kəndə təxminən 20 manata gedir.  
 

Təhlükə qeydi

Gəncə çayını keçmək üçün körpü yoxdur. Çay kifayət qədər enlidir, bu səbəbdən üzərindən hoppanmaq mümkün deyil və çayın içi ilə keçmək lazımdır. İlin yağıntılı vaxtlarında çayın səviyyəsi qalxır, həmin vaxtlarda çayı keçmək məsləhət görülmür.