Marşrutun ilk 3,5 km-lik hissəsindən sonra maşın yolu yoxdur, ensiz cığırlardır. Marşrut Şəmkir çayına qədər enişlə davam edir. Daha sonra kiçik eniş və yoxuşlar var.

Soyuqbulaq kəndinin girişindən başlayan bu marşrut kəndin içi ilə kəndin çıxışına doğru irəliləyir. Torpaq maşın yolu ilə davam edən marşrut 3,5 km sonra dağ cığırına keçir. Bu hissə çılpaq dağlıq ərazilərdir. 1,5 km irəlilədikdən sonra isə kiçik çayı keçərək meşənin içinə daxil olursunuz. 3,2 km meşə ilə davam edən marşrut sizi Şəmkir çayının vadisinə aparacaq. Buradan sol tərəfə 1 km gedib Qız qalasına qalxa, yaxud sağ tərəflə davam edib, 1,5 km sonra Mahrasa məbədinə çata bilərsiniz. Bu hissədə bəzi yerlərdə cığırlar seçilmir, işarələri diqqətlə izləyib yola davam etməyiniz lazımdır.

Bu marşrutu əks istiqamətdə də gedə bilərsiniz.

Ətraf cığırlar
Bu marşrut Mahrasa məbədi – Əmirvar marşrutu ilə əlaqələndirilə bilər.
 
Mövsüm
Bütün mövsümlərdə uyğundur. 

Qida və gecələmə

Marşrut üzərində yalnız Soyuqbulaq kəndində kiçik dükan var. Soyuqbulaq kəndində “Heyratın qonaq evi”ndə qalmaq olar (+99451 526 1188). Məbəd ətrafında gecələmək üçün yerlər yoxdur. Burada gecələmək niyyətiniz olsa, çadır və s. ləvazimatları özünüzlə götürməyiniz məsləhətdir.

Su
Kənddən sonra marşrut üzərində sadəcə iki yerdə bulaq var. Mahrasa məbədi ətrafında bulaq yoxdur. 

Nəqliyyat
Gədəbəy rayon mərkəzindən taksi və ya şəxsi avtomobil ilə Soyuqbulaq kəndinə gedə bilərsiniz. Soyuqbulaq kəndinə qədər yol asfaltdır və bütün növ maşınlar üçün uyğundur.

Təhlükə qeydi

Maşın yolu bitdikdən sonrakı 1,5 km-lik yol üzərində bir neçə yerdə çoban alaçıqları var. Bu ərazidə çoban itlərindən ehtiyatlı olmaq lazımdır. Pis hava şəraiti, azma təhlükəsi və s. kömək lazım ola biləcək hallarda çoban alaçıqlarına müraciət edə bilərsiniz.

Qız qalasının yolu dik qayalıdır. Qalxan və enən zaman sürüşmə ehtimalına qarşı diqqətli olmaq lazımdır.