Yürüş kifayət qədər çətin hesab olunur, ehtiyatlı və təcrübəli olmağı tələb edir. Cığırlar hər yerdə aydın sezilir və tam işarələnib. Bu işarələri izləyərək irəliləyin – cığırla meşəyə daxil olub, 1,5 km-dən sonra açıqlığa çıxırsınız. 2 km sərt yoxuşdan sonra irəlidə “Xan kek” deyilən yerdə cığır ikiyə ayrılır. Sağa gedən nişanlanmamış cığır Xoruz qayası və Qrızdəhnə şəlaləsinin yuxarısındakı kaskad şəlaləyə çatır. Daha irəli getmək təhlükəlidir və məsləhət deyil. Qrız kəndinə gedən sol cığır isə kanyonun sıldırım qayalıqlarının üstü ilə davam edir. Təxminən 6 km-dən sonra Qrıza çatacaqsınız. 

Ətraf cığırlar

Bu marşrutu Qrız-Qalaxudat marşrutu ilə birləşdirə bilərsiniz.

Mövsüm
Texniki olaraq çətin yürüş olduğu üçün uyğun dağ yürüş geyimlərinin olması çox vacibdir. Bir neçə yerdə sərt yoxuş olduğuna görə yüksəklik qorxusu olanlar üçün bu marşrut uyğun deyil. Qışda qarlı vaxtlarda bu marşrut ümumiyyətlə təhlükəli ola biləcəyi üçün məsləhət görülmür. Yaşıl təbiətdən zövq almaq istəsəniz, may – iyul aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı, yağışlı və küləkli hava şəraiti yürüşü xeyli çətinləşdirə bilər. 

Qida və gecələmə
Qrızdəhnə kəndi turistik kənddir və istər mövsümi, istərsə də il boyu fəaliyyət göstərən restoran və hotellər mövcuddur. Həmçinin qonaqlara yemək və gecələmə təklif edən qonaq evləri də var. Qrız kəndində isə restoran və ya kafe yoxdur. Ancaq öz evlərində yemək və gecələmə təklif edən qonaq evləri var. Gecələmək üçün qonaq evləri, hotel və digər yerləşdirmə müəssisələri, eləcə də kafe və restoranların yerini marşrutun xəritəsində tapa bilərsiniz.

Su 
Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Havanın istiliyindən asılı olaraq ən azı 1,5-2 litr su ehtiyatı götürməyiniz məsləhətdir. Marşrut boyunca yalnız bir yerdə içməli bulaq suyu var. Bu bulaq Qrız kəndinə çatmağa az qalmış marşrutun üzərindədir.

Nəqliyyat
Qrızdəhnə kəndinə yolsuzluq avtomobili ilə getmək mümkündür və Qubanın mərkəzindən yalnız yerli taksilər ilə 20-25 AZN qarşılığında getmək olar. Həmin gün Qrızdəhnədən geri qayıdacaqsınızsa, sürücü sizi gözləyə və əlavə ödəniş tələb etmədən Qubaya geri qaytara bilər. Yenə həmin gün Qrız kəndinə yürüş edəcəyiniz təqdirdə yürüşün sonunda Qrızdan Qubaya eyni sürücüyə 40 AZN əlavə ödəniş etməklə geri qayıda bilərsiniz.

İcazələr və xüsusi mühafizə edilən ərazilər 
Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.